Францускиот производител се враќа на пикап пазарот

Станува збор за модел наменет за африканските земји со кои ќе се забрза интернационализацијата на марката

Peugeot претстави пикап со едноставно име – Pick Up. Според зборовите на луѓето од францускиот производител, робусното возило со погон на сите четири тркала е наменето за оние на кои им треба издржлив работен автомобил едноставен за одржување. И додека во Европа продажбата на пикап возилата има уддел од само околу 1 отсто, во Африка овој сегмент е популарен и зазема повеќе од 10 отсто од вкупната продажба.

Не е прв пат Peugeot да пласира пикап во Африка – Французите уште во 1958 година дебитираа со моделот 403 Camionnette-Bâchée, кој потоа го наследија 404 Camionnette-Bâchée во 1967-мата и 504 Pick Up кој се произведуваше дури до 2005 година. Новиот Peugeot Pick Up е долг 5,08 метри, носивоста му изнесува 815 kg, а растојанието од тлото 21,5 cm. За погон е задолжен 2,5 литарски дизел со 115 KS, спарен со петстепен мануелен менувач. Робусните Yokohama пневматици доаѓаат стандардно, а од Peugeot наведуваат дека внатрешноста ќе биде најпространа во класата. Peugeot Pick Up во продажба ќе се најде во септември годинава.